గుణము ప్రదానము

పుట్టుకేమిగొప్ప పుణ్యంపుగుణమున్న

పూజనీయుడగును పుడమి లోన

అల్లెత్రాడులేనియత్యంతశ్రేష్టమౌ

ధనువునిష్టపడరుధరణీలోన

*శ్లోకం*

యస్య కస్య ప్రసూతోఽపి

గుణవాన్ పూజ్యతే నరః ।

ధనుర్వంశవిశుద్ధోఽపి 

నిర్గుణః కిం కరిష్యతి ॥

(సుభాషితరత్నావళిః)

*తాత్పర్యం*

గొప్పవాడైన వానికి గాని లేక నీచుడైన వానికి గాని, ఇలా ఎవనికో ఒకనికి పుట్టిన మనుష్యుడైనను ,అతడు సద్గుణసమ్పన్నుడైనవాడు ఐతే మాత్రమే ఈ లోకులచే పూజింపబడుతాడు. ఎట్లనగా , శ్రేష్ఠమైన వెదురుచే నిర్మితమైనను, అల్లెత్రాడు లేనిదైనచో అట్టి బాణము వలన ఏమి ఉపయోగము. ఎవరు అలాంటి ధనుస్సును ఆదరిస్తారు ? అలా గుణరహితమైతే శ్రేష్ఠమైన కులమందు పుట్టినను, పూర్తిగా ప్రయోజనశూన్యమని భావము.